分析三大升級：空間感知功能玩落安全、新控掣器兼顧體感與傳統操作、解像度大升終於有靚VR遊戲
PS VR2 2月22日正式發售，早咗試都係PlayStation官方邀請㗎啦！不過Vincent作為數十年二次元支持者，向來對VR、元宇宙呢啲唔三唔二嘅技術有保留，今次評測都諗住手緊啲，但估唔到幾有驚喜。
PS VR第一代都駁線好複雜，又要用cam，又要用move，今次簡單咗，仲連埋一對「PlayStation VR2 Sense 控制器」。開PS5（PS VR2只對應PS5），插線開VR頭戴，配對好兩個手掣，咁就玩得。當然最想連頭罩都可以無線，但電池同穩定度都係問題。
配戴感算係舒適，但唔算特別。最正嘅體驗係PS VR2有4個鏡頭，撳一撳function掣就可以轉鏡頭，睇到外面環境。雖然係黑白，但可以同時睇到介面同現實環境，好有科技感。第一次開機仲會感認障礙物同地板，幫你設定一個安全遊玩範圍，單係做設定都wow咗幾聲。
到正式打機，我哋試咗《地平線 山之呼喚》。VR2 Sense 比想像中好玩，佢有手指觸碰偵測，輕輕掂住做握拳、鬆手，唔撳掣手仔都會有動作。射箭操作算係預期之中，最抵讚係一啲攀爬動作、執道具動作，靈活得嚟好有真實感，最鍾意佢執生果埋口會咬一啖補血。
解像度同偵率提升好明顯，畫面清晰過PS VR1好多好多。玩緊嗰時會仲會隨時提醒你過咗遊玩範圍，唔安心嗰時又可以撳function掣睇返真實環境。
近年科技好悶，PS VR2算係少數上手玩會興奮嘅新產品，真係做到講咗幾年都冇乜進展嘅Mix Reality。不過遊戲廠商要做好VR遊戲都仲要努力，《地平線 山之呼喚》係一隻合格嘅技術展示遊戲，但都仲遇到一啲VR遊戲常見問題，包括用掣轉視角係分段式、移動速度太慢，另外用道具嘅體感有心思，但有時做多咗，例如一隻手撐開寶箱、一隻手執嘢嗰時操作好易卡住。
#PSVR2 #playstation #ps5