嗱~講明先，我個人呢就真係一般般頭戴式耳機嘅，一來好怕熱，唔好同我講啲質地點點點，總之笠住隻耳仔就係熱喇，二來又易整亂個頭，三來而家要戴口罩，加埋眼鏡，再加耳機，實在太多了…….
不過又咁，頭戴式耳機聲音的空間感同隔音，又真係唔係款款細耳機做到，加上而家天氣凍，用嚟聽歌都係正嘅。而以下實試過嘅Soundcore Space Q45，售價 $1,299 性價比真心高，所以都係要介紹下畀大家。
先講外型喇，Soundcore Space Q45走嘅係平實風，可以話係最簡單嘅設計，我就幾鍾意，因為頭戴式耳機本身都大大舊，設計太浮誇我個人就一般喇，簡簡單單就好。而雖然係膠製，但觀感和質感都好唔錯，而且可以維持較輕嘅重量。
耳機戴上頭感覺亦不俗，耳罩算幾軟熟，不過我自己頭大，加上眼鏡鏡臀在耳後，長戴都總有啲不適，不過一般人（頭細啲）應該係冇問題嘅。
連線方面，Q45用最新的藍牙5.3，穩定之餘，亦可同時連接兩個裝置，實試切換亦相當順暢，自動攪掂。另外，一大賣點，就是以$1,299，就可支援埋LDAC，如果你用Sony機，就真係福音。
降噪方便，亦唔係只係得開同關同通透模式，而係可以自行調整5級強度，甚至有可因應環境噪音而自動調校嘅自適應降噪。而在降噪中，亦可體驗頭戴式耳機嘅好處，就係即使用較強嘅降噪，耳壓感都唔會好大。至於通透模式就唔算好強，校低少少音樂應該會聽人講野清楚啲。
音色方面以普通用家角度，算相當唔錯，清晰、細緻、平衡，不過試過唔少頭戴式耳機，低音都會特別勁，但今次 Q45 就冇乜呢個感覺，算係正正常常，聽普通流行曲都好夠，但追求好勁節奏低音就可能會差啲啲，但整體就真係好唔錯嘅。
頭戴式耳機有個好處就係長氣， Q45就更加有成最長 65小時播放時間，開ANC都有50小時，就算用埋LDAC，都有37小時，基本上如果只係返工放工聽下，可能一個星期，甚至兩個星期都完全唔駛叉電。加上而家個個都去旅行，坐飛機用就啱晒，長途機都唔怕。
#耳機 #headphone #頭戴式耳機 #降噪 #LDAC #Soundcore #Q45 #ANC #高性價比 #高CP值 #耳筒 #耳機