iPhone 15 系列開箱，當然係萬眾矚目，但同期發佈推出嘅其實仲有其他產品，包括更新改款版嘅 AirPods Pro 2 USB-C版！
換編織USB-C線
包裝上其實都冇太大變動，大致源用番本來嘅設計，但盒背嘅相片就表明呢個係全新嘅USB-C版本。打開包裝盒，除咗機身有所不同，就係最底下嘅連接線，都同新一代 iPhone 15 系列睇齊，換上全新嘅 USB-C to USB-C 電線，更同樣係白色編織線，耐用度同觀感都有所提高。
USB-C插口
講番機身，最大分別當然就係改用咗 USB-C 叉電插口，雖然據了解叉電速度並冇改變，但隨著 iPhone都改用 USB-C ，加埋 MacBook 同 iPad 等等，就可以全線一齊用 USB-C叉電，更加方便！當然亦可以利用新 iPhone 15 系列嘅逆向叉電功能，用 C to C 線隨時緊急叉電！
升級防水防塵
另外，新 AirPods Pro 2 USB-C 亦暗暗地把防水防塵級別，由IPX4提升到IP54，防水性能大致一樣係防濺水，但就有更佳防塵功能，未到完全防止灰塵，但入灰塵都唔會影響正常運作，對於成日放喺衫袋褲袋嘅 AirPods Pro 嚟講，應該會有助提升耐用性。
支援無損？
係真嘅！真係支援無損音效，不過暫時消息係，只係喺配合將推出嘅 Vision Pro 先會有呢個功能。據知係利用 AirPods Pro 2 USB-C 入面嘅 nH2晶片做到，而照咁講，理應係舊版 Lightning版 AirPods Pro 2 都可以支援，不過暫時就未有確實消息。不過當然喇，首要嘅係，你要入手 Vision Pro先！而我比較關心嘅係，既然 Vision Pro 連 AirPods可以做到無損，係咪未來嘅 iPhone都有機會做到呢？唔通又係留畀 iPhone Ultra？（又無限FF）
配 iOS17 有新功能
忠實果粉可能已經早就玩過 iOS17，但一般人可能都係近日先正式更新，又甚至係換新 iPhone 15 先用。而 AirPods Pro 2 USB-C 只要配合 iOS17（舊版更新都得），就可以有全新嘅 「適應性降噪」同「對話感知」功能。 「適應性降噪」其實就同好多耳機嘅「適應性降噪」相似，可以自動隨環境噪音嘅大小調節降噪嘅水平，實試效果相當唔錯，調節怡到好處，亦唔會有突然時大時細嘅感覺，調節改幾好順，唔會有突兀感。
另外「對話感知」亦都幾實用，開啟後如果耳機感應到有外在人聲同你講嘢，而你又有出聲回應時，就會自動加大對方聲音，同降低環境噪音同音樂，令到用家唔使下下要除低耳機或者停音樂去傾計，都幾方便，不過反暫時試，如果本身音樂係開到好大，效果就唔太足夠。
新功能其實都真係幾實用，如果之前未有入手 AirPods Pro 2，今次都真係可以諗吓，配合埋新 iPhone 15 系列，又或者係升 iOS17 都係最佳拍擋！
睇埋下面條片啦！